MENDOGUS

MENDOGUS

primus Lithuanorum Dux. Cum enim Lithuaniae nomen, ante A. C. 1200. fere incognitum et ipsa gens contempta vicinorumque Russorum ac Polonorum servitio obnoxia esset, adeo ut propter inopiam nonnisi vilissimas res tributi locô penderet, primus Mendogus, Vir militiâ clarus, principatum gentis oppressae sumpsit A. C. 1252. et felici armorum successu eam a vicinorum contumeliis vindicavit. Ei successerunt complures, brevi omnes Imperiô, donec A. C. 1279. Vitenen miles, obtruncatô Dominô suô, Lithuaniam occuparet. Huic successit Gediminus A. C. 1300. qui fines Lithuaniae longissime per Rusos protulit et a finibus Prussiae, usque ad Pontum Euxinum protendit, unde Magni Duces appellari coepti. Eum excepit Olgerdus A. C. 1325. cuius filii fuerunt Iagello et Skirgello: quorum prior, regnô Poloniae per matrimonium potitus, primus omnium Lithuaniam, exterminatô idolorum cultu, fide Christianâ imbuere coepit, idque pro illorum temporum conditione prospere successit. Sed in coniungenda cum Poloniae Regno Lithuania maior difficultas. Opponebant se enim illi Skirgello frater et Vidoldus patruelis, qui denique frustra reluctanti Lithuaniam extorserunt, quae suos retinuit Magnos Duces, usque ad A. C. 1501. quô demum tempore Alexander. Lithuaniae Dux, creatus Rex Poloniae, unionem tamdiu desinderatam ad finem perduxit, a quo tempore idem et Poloniae Rex et Lithuaniae Dux censetur. Georg. Hornius Orb. Imper. p. 262. De familia Iagellonis vero, vide supra in voce Lithuania.